- 431 -

1407. Dez. 5. Liegnitz.

Herzog Ruprecht bekennt, dass der Rath der Stadt und Hans und Stephan von Rothkirch das Schloss Kotzenau ihm ausgebaut haben, dass er ihnen 109 Mark 10 Gr. als auch 1400 Mark dafür schuldig worden und das genannte Schloss für diese Summe verkauft habe.

Wir Ruprecht von gotis gnaden in Slesien . . herczog vnd herre zu Legnicz bekennen vffenlich mit desim briefe allin den, die en sehin adir horen lesin, daz wir gerechent haben mit vnsern getrawen ratmannen der stad zu Legnicz vnd Hannos vnd Stephan gebruder von der Rothinkirchen von des gebawdes wegen vff dem hawse Coczenaw, das wir sie habin geheissen bessirn vnd bawin vnd habin vns redelich vnd genugelich berechint, das sie doruff mit der wissen vorbawit haben, also das wir den obgenanten ratmannen, diedo yeczunt seyn, adir hernoch ratmannen zu Legnicz gekorn werden, vnd den vorgenanten Rotkirchen irn elichen erben vnd rechten nochkomlingen schuldig bliben rechtir schulde, die sie von vnserm geheisse doruff vorbawit haben hundirt mark vnd newn mark vnd czehn grosschen Pregisschir moncze vnd Polnisschir czal, die egenante summa geldis globin wir in guten trawen ane arg von vns, vnsern erben vnd rechten nochkomlingen wegen, erbhirren zu Legnicz, den obgenanten ratmannen zu Legnicz vnd allin irn nochkomen vnd ratmannen dosselbist vnd Hannos vnd Stephan Rotkirchen vnd iren erben gutlich vnd liplich zu beczalen vnd zurichten mit sampt den fierczehnhundirt mark moncze vnd czal, alz vor ist geschreben, als wir en daz egenante haws vor eyne sulche suma geldis vorkowfft haben. Ouch wen wir adir vnsre nochkomen erphirren zu Legnicz dasselbe howss zu vnsers liebis adir lande not vnd schutczunge wurden vnd musten ynnenemen, das sal den obgenanten vnd irn nochkomen vnd erben an allin geniessin, freyheiten, hirscheften vnd zugehorungen, die zu demselben howsse gehoren, vnschedlich sien vnd nichts doran abgeen noch des briefis lawte zuhaben vnd czubesiczen, den wir in vormols dorobir habin gegebin. Des zu orkunde habin wir en desin briff lassen vorsigiln mit vnserm ingisigile zu Legnicz, noch gotis geburd fierczenhundirt jare donoch im sebinden jore an sante Niclos obende. Dobei sint gewest vnser getrawen Nitsche Vngerathen, Hannos Gawen, Pawil Brokendorff, Nickil Vyow, Hans Polcz von Hoberg, Burgold Slewicz vnd Johannes, vnser schreiber, dem wir desen briff beuolen.

O. d. St. L. No. 221. An Pergamentstreifen das Wappensiegel in rothem Wachs.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866